USA er kloyvt í tvey

Fá høvdu væntað tað, men eftir at hava voterað í tveir dagar, gjørdust allir 12 nevningarnir samdir um, at Trump er sekur. Og teir eru enntá samdir um, at Trump er sekur í øllum 34 ákærunum í ákæruritinum.

Sokallaða hússj málið snýr seg um, at Donald Trump skal hava brúkt almennar pengar, sum vóru markaðir til valstríðið, til at rinda pornostjørnuni, Stormy Daniels, fyri at fáa hana at tiga um kynsliga sambandið, sum tey høvdu havt. Hetta var upp undir seinasta forsetaval.

Tað var ákæruvaldið í New York, ið hevði reist málið. Og í gjárkvøldið fall so dómurin. Donald Trump er dømdur sekur í øllum 34 ákærum.

Rætturin skal nú til at viðgera revsingina. Dómarin hevur boðað frá, at revsingin verður ásett tann 11. juli, sum fýra dagar fyri, at republikanararnir formliga skulu gera av, hvør verður forsetavalevni. Revsiramman er upp í fýra ára fongsul.

Grátur, gleði og vreiði. Tað eru nakrar av kenslunum, sum merkja amerikanska samfelagið eftir dómin í gjárkvøldið.

Men Trump stuðlarnir eru trúgvir og ætla ikki, at dómurin skal ávirka valið. Í øllum førum ikki skeiva vegin.

Fyrireikingarnar til valið halda fram sum vanligt, og stuðulin er framvegis har.

Og so er tað hin legan, sum heldur, at USA ikki kann hava ein forseta, sum er lygnari og dømdur brotsmaður.