849 skinn í Hvannasundi

Grindin var 849 skinn. Drápspartarnir vóru 1,2 skinn og heimapartarnir 0,15 skinn, sum verður býtt til fólk í Hvannasunds, Viðareiðis og Kunoyar kommunum, umframt til bygdirnar Lamba, Strendur, Nólsoy og Rituvík.

Grindin varð funnin um hálvgum tólv tíðina í gjár, men drápið byrjaði ikki fyrr enn 18.30, tí bíðað var eftir, at kappróðurin á Norðoyastevnu var liðugur.

Jens Jensen, sýðslumaður, sigur, at drápið var steðgað eftir 20 minuttum, og eftirverandi hvalirnir riknir út aftur. Hann veit ikki, hvussu nógvir hesir vóru. Nakrir teirra gjørdu tó landgongd eftir hetta, og teir vórðu eisini avlívaðir.

Tað var eisini eitt ivamál, um verkfallið mundi ávirka grindadrápið, men sum sýðslumaðurin hevur fingið upplýst, vildu verkafeløgini í verkfalli ikki leggja seg útí grindadrápið.