U18-Sandflogbóltur: Føroysku dreingirnir víðari til EM

Við sigri á Armenia hava føroysku U18-dreingirnir í flogbólti, Hákun Nón og Rani Ákason, tryggjað sær pláss í endaspælinum um evropeiska meistaraheitið í sandflogbólti

Føroysku U18-dreingirnir, Hákun Nón og Rani Ákason, hava spælt seg í EM-endaspælið í sandflogbólti

Mynd: Flogbóltssamband Føroya

Símun Christian Olsen

10.07.2024 - 15:27

Hákun Nón og Rani Ákason hava spælt seg víðari úr undankappingini í sandflogbólti fyri U18-dreingir, sum er í Georgia í hesum døgum.

Tað er greitt, eftir at teir báðir vunnu 2-1 á einum liði úr Armenia fyrrapartin. Settúrslitini vóru 21-19, 18-21 og 15-11. Teir skulu tí kappast í sjálvum endaspælinum um evropeiska meistaraheitið.

Vinna føroyingarnir á Andorra, enda teir á fyrsta plássi í bólkinum.

Genturnar úti

Osla Johannesen og Maria Teresu Vitalis taptu sínar dystir ímóti Armenia og Aserbadjan, og halda tí ikki fram í kappingini.

Nógvi hitin darvaði genturnar, sum hava aldur til somu kapping næsta ár, skrivar Flogbóltssambandið. Hitin í Georgia er 32 stig í skugganum.