Vit mugu tryggja kvoturnar til skipini

-Skulu vit varðveita grundarlagið undir skipunum, so er neyðugt at keypa kvotur, sigur sigur stjórin í Christian í Grótinum samtakinum, Jan Petersen.

Jan Petersen vísir á, at makrelsemjan millum Føroyar Norra og Bretland hevur við sær, at samlaða kvotan til Føroyar minkar munandi. Og sama er væntandi, um semja fæst um at býta kvoturnar av norðhavssild.

Sambært stjóranum er tað beinleiðis orsøk til, at stóra reiðaríið við heimstaði í Klaksvík keypti uppsjóvarkvoturnar frá sp/f Sjógæti. 

Les eisini: Sjógæti selt menningarkvotur

Ein makrelsemja var væntandi, og tí keypti Christian í Grótinum samtakið kvoturnar, sum felagið Sjógæti í 2018 fekk tillutað sum menningarkvotur. Talan var tá um 900 tons av makrelkvotu og 450 tons av sildakvotu. Menningarkvoturnar blivu tó seinni broyttar til varandi eginkvotur - og tær kunnu seljast.

Jan Petersen vil ikki upplýsa, hvat Christian í Grótinum samtakið hevur goldið fyri kvoturnar, ið sp/f Sjógæti fekk útlutað sum menningarkvotur í 2018. Sjógæti hevði 27,8 milliónir krónur í yvirskoti í roknskapinum fyri 2023, sum var árið, tá menningarkvoturnar vórðu seldar.

Hoyr samrøðu við Jan Petersen her: