Løgmaður: Óneyðugt við ráðharrabilum

Í vikuni kom nevndin, sum varð sett at meta um samsýning og eftirløn hjá løgmanni og landsstýrisfólkunum, við sínum tilmæli. Nevndin mælir til, at løgmaður og landsstýrisfólk hava ráðharrabil tøkan. 

- Tað er púra óneyðugt, at landskassin skal hava so stórar útreiðslur av at flyta løgmann og landsstýrisfólk aftur og fram, sigur Aksel V. Johannesen við Sosialin.

Í Grønlandi fáa landsstýrisfólk frían bil uttan førara, og verða tey skattað á sama hátt sum onnur, ið hava frían bil frá arbeiðsgevaranum. Í Íslandi, Danmark og Norra hava landsstýrisfólkini ráðharrabil við bilførara, og bilurin er skattafríur til tænastukoyring.

Nevndin mælti til at geva løgmanni og landsstýrisfólki ráðharrabil, og í staðin strika kostnaðar-endurgjaldið ella ferðastuðulin.

Nevndin metti annars, at sjálv lønin hjá løgmanni og landsstýrisfólkum er rímulig. 

Løgmaður tjenar í dag 97 túsund og 87 krónur um mánaðin og landsstýrisfólkini 82 túsund og 150 krónur. Eftirlønin er 15 prosent. 

Harumframt kunnu landsstýrisfólk, sum hava bústað uttanfyri Havnina, fáa endurgoldið útreiðslur av at leiga okkurt at búgva í í Havn. 

Endurgjaldið er í mesta lagi 10.000 krónur um mánaðin.