Vælferðin í vanda, um blokkstuðulin verður tikin burtur

- Tað fer at hava aðrar og álvarsamar avleiðingar við sær, um vit gera øðrvísi raðfestingar fyri at sleppa undan blokkstuðulinum úr Danmark. 

- Hetta fer at ganga út yvir vælferðina, og tí eiga vit ikki at gera, sum Landsbankastjórin leggur upp til.

Tað sigur formaðurin í Sambandsflokkinum, nú vit í tíðindunum í gjár hoyrdu Landsbankastjóran siga, at um tað bleiv raðfest øðrvísi politiskt, so hevði búskapurin tolað, at blokkstuðulin varð tikin heilt burtur.

Bárður á Steig Nielsen heldur, at um tað bleiv raðfest øðrvísi, hevði livistøðið uttan iva lækkað - og úrslitið hevði verið fólkafráflyting.

Hann vísir á, hvussu nógv ein milliard - sum er tað vit samlað fáa fíggjað úr Danmark - hevur at siga í føroyska búskapinum.

Malan Johansen, landsbankastjóri, vísir á ítøkiligar broytingar, ið høvdu gjørt føroyska búskapin sterkari. M.a. at innrætta heimaflotan øðrvísi, so hann kundi givið tilfeingisrentu.

Men hesar broytingar høvdu gjørt lítlan mun í samlaðu myndini, heldur Bárður á Steig Nielsen. Og hann heldur møguleikarnar at betra um heimaflotan vera smáar.

Hoyr samrøðu við Bárð á Steig Nielsen, formann í Sambandsflokkinum, her: