Aðalráð biðið um at endurskoða mannagongd

Løgtingsins umboðsmaður hevur biðið Fiskivinnu- og samferðslumálaráðið endurskoða mannagongdina um innlitsmál.

Umboðsmaðurin fekk klagu um, at ráðið gav avmarkað innlit um vinnuligar fiskiroyndir.

Upplýsingar vóru strikaðar í teimum latnu skjølunum, uttan at nærri var greitt frá grundgevingini fyri, at tær vóru strikaðar.

Fiskivinnu- og samferðslumálaráðið ásannar nú, at ítøkiliga metingin var ikki nóg neyv og ikki í samsvari við lógina um innlit.

Ráðið er tí sinnað at viðgera málið av nýggjum.

Kringvarpið bað um innlit í alt tilfar um eitt felag, sum fekk kvotu til vinnuligar fiskiroyndir eftir svartkjafti.

Ráðið spurdi felagið, sum innlitið var um.

Felagið helt ikki, at innlit skuldi gevast.

Fiskivinnu- og samferðslumálaráðið avgjørdi síðani, uttan at kanna umstøðurnar nærri, ikki at geva innlit, tí talan var um rakstrar- og vinnuviðurskifti.

Nú skal ráðið viðgera málið av nýggjum og koma við grundgevingum.