Partarnir skulu taka støðu til skitsu um semingsuppskot

Semingin um sáttmálarnar fyri maskinmeistararnar hjá SEV og IRF helt á til seint í gjárkvøldið.

- Partarnir hava fingið eina skitsu til semingsuppskot at taka støðu til, og vit skulu frætta frá teimum á middegi. Út frá svarinum taka vit støðu til, um vit halda fram við samráðingunum, sigur Terje Sigurðsson, semingsmaður.  

Hann sigur, at talan er um truplar samráðingar, og langt er millum partarnar. 

Semingsstovnurin boðsendur 5. juli

Semingsstovnurin, Kommunala arbeiðsgevarafelagið og Maskinmeistarafelagið fóru á fund um maskinmeistararnar hjá SEV og IRF í gjár.

Semingsmaðurin varð boðsendur tann 5. juli, tá ið samráðingarnar millum partarnar slitnaðu.

Sáttmálin fór úr gildi 1. oktober 2022.

Løgtingið legði uppí

Í 2005 eydnaðist ikki at fáa semju millum SEV og Maskinmeistarafelagið. Tað vil siga, at feløgini gjørdu semju, men Fíggjarmálaráðið góðtók ikki semjuna.

Tað endaði við, at maskinmeistararnir hjá SEV fóru í verkfall, og fólk kring landið mistu streymin í nøkrum tíðarskeiðum. Løgtingið legði uppí, tí mett var, at streymur var lívsneyðugur. Løgtingið sendi við lóg maskinmeistararnar aftur til arbeiðis við at leingja gamla sáttmálan. Seinni gjørdu partarnir nýggjan sáttmála.  

Um semja ikki fæst við maskinmeistararnar, og teir umhugsa at fara í verkfall, er spurningurin, hvat løgtingið tá ger.