Tónleikastjørnur í Barnaútvarpinum: Næstseinasti partur er við Eivør

Eivør er bjartasta stjørnan í føroyska tónleikaheiminum. Í alt hevur hon givið 10 fløgur út í egnum navni. Í 2021 vann hon tónleikavirðisløn Norðurlandaráðsins, og sama ár fekk hon riddarakrossin frá danska kongshúsinum.

Eivør hevur eisini gjørt tónleikin til Netflix-røðina, The Last Kingdom, og hon hevur framført í samband við 10-ára heiðurssýning hjá Game Awards í The Hollywood Bowl í Los Angeles.

Í Barnaútvarpinum hesa vikuna tosa vit við føroyskar tónleikastjørnur. Vit hava millum annað prátað við Marius, Jens Marna, Beinir Troest og Guðrið Hansdóttir. Tær samrøðurnar finnur tú her.

Eivør í Barnaútvarpinum

Í næstseinasti parti um tónleikastjørnur práta vit við Eivør. Hon hevur júst havt útgávukonsertir í Norðurlandahúsinum, og í næstum fer hon á konsertferð. Eivør greiðir frá, nær hon byrjaði at syngja, og hvussu tað er at vera sangstjørna. Sendingin er á VIT-ljóð, tú finnur hana her.

Men hetta er ikki fyrstu ferð, at Eivør er gestur. Tá ið Eivør var 11 ára gomul, var hon í Barnaløtuni í sjónvarpinum saman við vinkonuni Petsi. Tær sungu, meðan Heini spældi klaver. Hans Petur lærdi tær at hita røddina upp. Vit hava funnið hesa løtuna fram aftur úr savninum, og tú kanst síggja brot úr barnaløtuni frá 1992 her: