Kina ætlar at gera risastórar íløgur í Afrika

Xi Jinping, forseti í Kina, ætlar at gera íløgur í Afrika fyri 336 milliardir krónur næstu trý árini.

Tað boðar hann frá í eini røðu á toppfundinum hjá felagsskapinum "Forum fyri Kina og Afrika" (FOCAC), skrivar Reuters,

Hann lovar eisini, at Afrika skal fáa eina millión nýggj arbeiðspláss, og Kina fer at stuðla 30 verkætlanum, sum hava við undirstøðukervið at gera.

Fríhandil

- Vit eru til reiðar at hjálpa til at menna fríhandilsavtalur á afrikanska meginlandinum, styrkja um vørustreymin og fíggjarliga samstarvið til gagns fyri menningina av Afrika, sigur Xi Jinping.

Toppfundurin í Forum fyri Kina og Afrika verður hildin triðja hvørt ár. Í ár verður hann hildin í Beijing, høvuðsstaðnum í Kina.

Fleiri enn 50 afrikanskir stjórnarleiðarar eru við. António Guterres, aðalskrivari í ST, er eisini við á fundinum.