- Tíðindi, mentan og ítróttur
Triðingurin fiskaður
Triðingurin fiskaður
Føroysk skip hava nú fiskað ein triðing av makrelinum, sum tey sleppa at fiska í norskum sjógvi
![](https://kvf.fo/sites/default/files/styles/grein-ovasta-mynd/public/pelagos_0.png?itok=5mS55ESS)
Hóast føroyski makrelurin skal seljast í Noregi, eru keypararnir fyri tað mesta virki í Føroyum.
10.09.2024 - 06:32
Føroysk skip hava nú fiskað ein triðing av makrelinum, sum tey sleppa at fiska í norskum sjógvi.
Norges Sildesalgslag sigur í samandráttinum fyri síðstu viku, at føroysku skipini høvdu fiskað 31 prosent av kvotuni í norskum sjógvi.
Tað eru 11.036 tons av 35.491 tonsum.
Avtalan við Noreg um makrel sigur, at allur makrelur, sum føroysk skip fiska í norskum sjógvi, skal seljast gjøgnum ella við góðkenning frá Norges Sildesalgslag.
Tað er tó ikki tað sama sum, at makrelurin skal landast í Noregi.
Tann nógvi makrelurin hjá føroyskum skipunum er seldur virkjum í Føroyum.
Norsk skip hava fiskað 44 prosent av kvotuni hjá teimum, sum er 237.907 tons.
Nýggjastu sendingar í ÚV
Nýggjastu sendingar í SV