Oyggjaleikirnir verða nú betri

Betri Stuðul og Oyggjaleikir 2027 eru farin í navnasamstarv, og tað ber í sær, at leikirnir í Føroyum frameftir fara at eita Betri Oyggjaleikir ella Betri International Island Games XXI. Umframt navnasamstarvið eru fimm onnur samstørv gjørd, sum fíggjarliga syrgja fyri, at leikirnir eru í góðum hondum. Samstørvini við Betri, Atlantsflog, Bakkafrost, MBM, Smyril Line og SMS fevna eisini um leikirnar í Orknoyggjum 2025 og Ítróttafagnaðin 2024, 25, 26 og 27. 

 - Vit hava fingið pening frá landinum allafyrst, tað er ein stór upphædd, og so er hetta eisini ein stór upphædd afturat við hesum seks samstørvunum, sum vit hava fingið nú. Vit fáa ikki arbeitt uttan pengar, so hetta hevur alt at siga, segði oyggjaleikasamskiparin hjá ÍSF, Solby A. Christiansdóttir. 

 - Limirnir hjá okkum eru við í øllum, sum gongur fyri seg í samfelagnum, har ímillum ítrótti. Bæði sum íðkarar, venjarar, leiðarar og tey, sum vara av feløgunum og allir teir óteljandi tímarnir av sjálvbodnum arbeiði, sum liggur í tí føroyska ítróttinum, sum ger at tað ber til. Tí hildu vit, at tað var púra upplagt, at vit stuðla oyggjaleikum, segði formaðurin í Betri p/f, Jens Johan Dam.

Lætt at finna stuðlar

Síðan 1998 hevur skotski bankin NatWest International verið navnastuðul hjá IIGA, og hava oyggjaleikir tí itið NatWest International Island Games í 25 ár. Nú hevur bankin tikið seg burturúr, og seinastu NatWest leikirnir vóru í Guernsey í fjør. Eingin nýggjur IIGA stuðul er funnin, og tí fingu Føroyar høvi til at finna sítt egna navnasamstarv.

 - Tá vit fingu høvi at fara út og finna okkara egna navnasamstarv umframt onnur samstørv, so tóku vit av og fóru út at vita. Tí vit vita, at Føroyar gleða seg til at fáa Oyggjaleikirnar og føroyingar eru glaðir fyri Oyggjaleikirnar. Tað, at vit hava fingið hesar seks fyritøkurnar at samstarva við okkum, sigur alt um, hvønn kalibur og status Oyggjaleikirnir hava í Føroyum.

Búmerkið avdúkað

Fyrr í summar skrivaði ÍSF út búmerkjakapping til Oyggjaleikir 2027, og á samkomu í dag varð eisini búmerkið, sum Robert Gutke av Eiði eigur, avdúkað.  Aldur, vindur, rørslur, breytir og veðrahorn eru nakað av tí, sum sæst aftur í búmerkinum, sum ein samd dómsnevnd valdi millum tey 51 innkomnu uppskotini. 

Oyggjaleikirnir 2027 verða í døgunum 3.-9. juli, og tá fara eini 2.500 ítróttafólk at kappast í 14 ymsum ítróttagreinum í Føroyum.