Friðingarnevndin viðger byggingina hjá Varðanum av nýggjum

Náttúrufriðingarnevndin í Suðuroyar sýslu viðger nú av nýggjum byggingina hjá Varðanum í Tvøroyri.

Varðin Pelagic og Tvøroyrar kommunu hava biðið um at fáa málið úr aftur Yvirfriðingarnevndini, og hava biðið náttúrufriðingarnevndina viðgera tað av nýggjum.

Yvirfriðingarnevndin hevði annars spurningin um ætlaðu útbyggingina hjá Varðanum Pelagic á Tvøroyri.

Men náttúrufriðingarnevndin viðger nú eisini upprunaligu byggingina hjá Varðanum Pelagic fyri tíggju árum síðani.

Spurningurin er, sum skilst, um kunngerðin, sum loyvir undantøkum frá reglunum um bygging við sjóvarmálan, var rætt brúkt í 2013.  

Tá náttúrufriðingarnevndin í Suðuroyar sýslu er liðug, fer málið aftur í Yvirfriðingarnevndina.