Vantandi útboð kann kosta pengar

Møguleiki er fyri, at Fíggjarmálaráðið lækkar játtanina hjá stovnum, sum mett verður ikki eru nóg virknir á Keypsportalinum. 

Um stovnur ikki bjóðar keyp út alment, er helst orsøk til at halda, at játtanin hjá honum er heldur rúmlig.

Tað sigur Ruth Vang, landsstýriskvinna, í svari til Bárð á Lakjuni, løgtingsmann, sum spurdi, um stovnar landsins fara ov lætt um ásetingarnar í rundskrivinum um at keypa vørur og tænastur.

Landsgrannskoðanin hevur staðfest, at nógvir stovnar ikki altíð fylgja reglunum í rundskrivinum.

Hetta hevur Gjaldstovan roynt at bøtt uppá við at átaka sær ein størri ráðgevandi lut og við vegleiðingum.

Nógvar orsakir eru til, at stovnar ikki fylgja rundskrivinum.

Teir lata sum um teir einki vita um krøvini í rundskrivinum, ella teir hava ikki royndir ella duga ikki at bjóða út.

Eingin føroyskur veitari

Teir hava ikki orku ella tíð at bjóða út. Sum oftast tí farið verður ov seint í gongd.

Stovnar halda, at eingin føroyskur veitari er, og teir hava góðar royndir við verandi veitara.

Hóast møguligt er at søkja um undantak fyri at bjóða út, so kemur tað ofta fyri, at stovnar heldur ikki gera tað, svarar landsstýriskvinnan.

Hon sigur eisini, at rundskrivið verður dagført.

Millum annað eigur tað at fáa játtanarligar avleiðingar, um rundskrivið ikki verður hildið.

Ætlanin er eisini at minka upphæddirnar fyri, nær bjóðast skal út.