Iran bíðar við at herða lógina um, hvussu kvinnur skulu vera ílatnar

Í Iran hevur tjóðartingið útsett gildiskomuna av eini lóg, sum herðir kravið um, hvussu kvinnur skulu klæða seg. Tað sigur varaforsetin Shahram Dabiri.

- Stjórnin hevur avgjørt, at politiska leiðslan og ovasta trygdarráðið í landinum skal viðgera lógina umaftur, segði Dabiri við blaðið Ham Mihan.

Samtykta herðingin merkir m.a., at kvinnur, sum ikki krógva hárið og hálsin við einum plaggi, kunnu missa almennan stuðul og fáa stóra bót. Lógin skuldi eftir ætlan koma í gildi nú í desember. 

Masoud Pezeshkian, forseti, sum er mettur sum moderatur, nýtti í síðstu viku sýtingarrætt sín móti lógini. Hann heitt á ovasta trygdarráðið um at taka støðu til málið. Ráðið er ovasti myndugleiki í trygdarspurningum, og Pezeshkian vónar, at ráðið fer at linka krøvini í lógini eitt sindur. 

Greinarar siga, at avgerðin er ein sigur fyri Pezeshkian í innanhýsis stríðnum um vald móti teimum konservativu. Forsetin óttast fyri ófriði í landinum, um lógin verður sett í gildi.

'Kvinna, lív, frælsi'

Síðani islamsku kollveltingina í 1979 hevur verið krav, at kvinnur skulu krógva hárið og hálsin. 

Í størstu býunum í Iran er tó fleiri kvinnur, sum ikki akta boðunum. Og tað tók dik á seg í sambandi við hópmótmælini í Iran á heysti 2022, har herrópið var 'Kvinna, lív, frælsi'.

Mótmælini komu í kjalarvørrinum á, at unga kurdiska kvinnan Masha Amini doyði í varðhaldi hjá løgregluni. Hon var handtikin fyri ikki at hava krógvað hárið nóg væl.