Gongur striltið at skráseta oljutangar

Fleiri kommunur hava trupult við at liva upp til kunngerðina um at skráseta allar oljutangar í kommununi

Nógvar upplýsingar um oljutangar eru ikki til at fáa fatur á. Tí er trupult hjá kommununum at skráseta allar oljutangar

Mynd: Savnsmynd

11.01.2025 - 12:01

"Fyri kommununa er tað ein ómøgulig uppgáva, tí vit kunnu bara skráseta út frá teimum upplýsingum, sum borgarin gevur okkum."

Tað sigur Karl Johansen, borgarstjóri í Klaksvíkar kommunu, sum eins og aðrar kommunur hevur trupult við at liva upp til kunngerðina um at fyribyrgja dálking frá oljutangum.

Í kunngerðini, sum er frá 2018, stendur millum annað, at kommunurnar í seinasta lagi 1. januar 2022 skulu hava skrásett allar oljutangar, sum rúma upp til 6.000 litrar, og øll íbundin rør. Og tað eru upplýsingar um framleiðara, framleiðsluár og mangt annað, sum skulu fáast til vega.

"Nógv fólk, man tosar við, siga, at tey geva upp, tí tey finna ikki upplýsingarnar nakrastaðni. Á sjálvum tanganum stendur einki", sigur Karl Johansen.

Sambært kunngerðini um oljutangar frá 2018 skuldu tangar við ókendum framleiðsluári ella sum ikki eru góðkendir ella hava ókenda konstruktión ella ókent tilfar, takast úr nýtslu áðrenn 1. januar í ár, um húsini eru bygd í tíðarskeiðnum frá 1961 til 1980.

Og 1. januar 2026 verður tað sama galdandi fyri hús, sum eru bygd í tíðarskeiðnum frá 1981 til 2000.

Hoyrið innslag her:

Oljutangar_innslag