Konditaríið verður tikið niður - bygningur í sama stíli kemur í staðin

Konditaríið í miðbýnum í Havn skal takast niður, og ein bygningur í sama stíli skal byggjast upp aftur.

Tað sigur Regin Petersen, stjóri í byggifyritøkuni HVT, sum eigur Kondittaríið. 

Hann sigur, at hetta má gerast, tí at bygningurin er í so vánaligum standi, og tað loysir seg ikki at gera hann í stand. 

Hann váttar, at leigarin er uppsagdur. Hann vil ikki gera fleiri viðmerkingar til ætlanina enn.

Tórshavnar kommuna sigur við útvarpið, at kommunan ikki hevur fingið nakra umsókn um at taka bygningin niður, ella at byggja nýggjan bygning á staðnum.