Ávara móti sera skaðiligum kostískoyti

Ávarað verður móti kostískoyti, sum kunnu skaða gøgn og nervalag.

Talan er um trý kostískoyti, sum TikTok brúkarin ”mpower.dk” selur á https:mpower.nutrition.shop

Danska Fødevarestyrelsen hevur givið boð um at steðga søluni, men virkið hevur ikki stegðað henni.

Heilsufrøðiliga starvsstovan veit ikki, um føroyingar hava keypt frá heimasíðuni "mpower.dk".

Skaðiligt kostískoyti er í Føroyum

Men hon veit, at kostískoyti við einari ella fleiri av heilsuskaðiligu plantunum eru keypt til privata nýtslu í Føroyum í 2024.

Sambært upplýsingum á heimasíðuni hjá Heilsufrøðiligu starvsstovuni er talan um kostískoyti, sum kann skaða livrina illa og skaða nervalagið varandi.

Tað eina slagið kann skaða immunverjuna og skjaldkertilin.

Og triðja slagið kann hava við sær ójavnvág í hormonskipanini hjá kvinnum og hava neiliga ávirkan á kynsgøgn og sáðkyknugerð hjá monnum.

Á heimasíðuni hjá Heilsufrøðiligu starvsstovani sæst, hvussu kostískoytini eita.

Heimasíðan eitur hfs.fo.