Ásla spælir yrkisfótbólt og hevur trý smábørn

Í 2018 fór Ásla Johannesen av landinum at spæla fótbólt, og síðani hevur hon spælt við trimum feløgum á hægsta stigi í Norðurlondum. Nú spælir hon við Piteå IF í bestu svensku fótbóltsdeildini.
Hesa tíðina sum yrkisfótbóltsspælari uttanlands hava Ásla og unnustan, Birita Joensen, fingið trý børn, og eftir at hava búð nøkur ár í Danmark, búgva tær nú har norðuri í Svøríki.
– Tá ið eg flutti til Piteå at spæla, hugsaði eg um at koma í eitt gott fótbóltsumhvørvi, sum var á høgum støði, men tað hevði eisini stóran týdning fyri meg, at tað skuldi vera eitt gott stað fyri familjuna at vera, sigur Ásla Johannesen.
– Tá ið Birita nú hevur valt at liva hetta ævintýrið saman við mær, so leingi sum tað varðar, so valdi eg tað felagið, sum passaði best til mín fótbólt og til okkara familju, og tí fall valið á Piteå, sigur hon.
Í fimta parti av poddvarpsrøðini Kvinnur í ítrótti verður tosað við Áslu Johannesen um hendingaríka lívið sum yrkisfótbóltsspælari uttanlands. Sendingin kann hoyrast her.