Fimm heilivágssjálvtøkur á veg

Arbeitt verður framvegis við at tryggja lættari og javnbjóðis atgongd til handkeypsheilivág.

Tað sigur Súsanna Bertholdsen, landsstýriskvinna, í svari til Jørgen Niclasen, tingmann.

Apoteksverkið endurskoðar regluliga atgongdina til handkeypsheilivág í Føroyum.

Handkeypssølurnar eru har, sum einki apotek ella sjálvtøka eru.

Tær selja handkeypsheilivág, sum er nógv eftirspurdur. 

Aftrat teimum fýra apotekunum, søludeildini í Steinatúni í Havn og sjálvtøkunum eru 19 handkeypssølur.

Fleiri sjálvtøkur

Við apotekið í Vágum verður ein sjálvtøka. 

Sjálvtøkur vera eisini við apotekini í Klaksvík og Runavík.

Seinni í ár koma sjálvtøkur við apotekið á Tvøroyri og í Landssjúkrahúsinum, upplýsir landsstýriskvinnan. 

Fyrsta sjálvtøkan kom í fjør. Hon er við Tjaldurs apotek í SMS í Havn. 

Apoteksverkið sigur seg hava góðar royndir við henni.

Í sjálvtøkunum ber til at keypa handkeypsheilivág alt samdøgrið.