Sjúkrarøktarfrøðingar fáa nú boðið talgilda refleksjón

Sjúkrarøktarfrøðingar í Føroyum fáa nú høvi til talgilda reflektión, tá teir hava verið í truplum støðum til arbeiðis. 

Hetta boðar Sjúkrarøktaretiska ráðið frá í tíðindaskrivi. 

Endamálið er tvíbýtt:

1. At gera refleksjónina lættari atkomuliga og stuðlandi fyri einstaka sjúkrarøktarfrøðingin og harvið styrkja tilvitið um og hegni til at reflektera.
2. At geva Sjúkrarøktaretiska ráðið betri innlit í, hvørjar etiskar avbjóðingar sjúkrarøktarfrøðingar í Føroyum standa í, soleiðis at átøkini hjá Ráðnum kunnu málrættast enn betri.

Talgild refleksjón hevur fleiri fyrimunir, sum bæði kunnu gagna sjúkrarøktarfrøðingunum og arbeiðsumhvørvinum. Ein av týðandi fyrimununum er, at skipanin er lætt atkomulig, tí hon kann nýtast nær sum helst og á ymiskum tólum, sum fartelefon, teldu ella teldli. Hetta ger tað lættari hjá teimum at luttaka í etiskari refleksjón, hóast nógv er at gera.

"Tað er týdningarmikið, at sjúkrarøktarfrøðingar kunnu svara dulnevndur. Hetta gevur størri frælsi til at seta orð á etiskar avbjóðingar, sum kunnu vera truplar at umrøða opið, eitt nú atburð hjá starvsfeløgum ella leiðslu, sum ikki er í samsvar við fakligu virðini. Tryggleikin í at kunna viðgera viðkvæm evni uttan ótta fyri avleiðingum ger tað møguligt at fáa eitt meira realistiskt innlit í tær veruligu etisku avbjóðingarnar á arbeiðsplássunum," skrivar Sjúkrarøktaretiska ráðið í tíðindaskrivinum. 

Jana Mortensen

Jana Mortensen er forkvinna í Sjúkrarøktaretiska ráðnum.