Heilsurøktarafelagið fingið væl burturúr

Heilsurøktarafelagið er við í avtalu um neyðtilbúgving í samband við arbeiðssteðg.

- Vit vilja ongantíð seta lív og heilsu í vanda hjá okkara gomlu og veiku, og tí gingu vit við til at formalisera hesi viðurskifti. Tað sigur Bingerð Fosságil, forkvinna í felagnum, sum metir seg hava fingið væl burturúr nýggja sáttmálanum við Fíggjarmálaráðið og Kommunala Arbeiðsgevarafelagið.

Fýra feløg í neyðtilbúgvingini

Fíggjarmálaráðið boðar seinnapartin frá, at tey nú hava avtala við fýra fakfeløg um neyðtilbúgving í samband við arbeiðssteðg.

Feløgini eru Heilsurøktarafelagið, Ljósmøðrfelag Føroya, Kost- og Føðslufelagið og Starvsfelagið. 

Í tíðindaskrivi sigur Fíggjarmálaráðið, at endamálið er at tryggja, at mest átrokandi uppgávurnar, sum at tryggja lív, heilsu og týðandi samfelagslig virði, verða røktar. 

- Allar aðrar uppgávur skulu bíða til aftaná arbeiðssteðgin, sigur Fíggjarmálaráðið.