Heidi Sevdal kúvendi: Skuldi gevast

Tað var ein fegin og troytt Heidi Sevdal, sum eftir seinasta landskappingardyst í fjør, boðaði frá, at hon ætlaði at gevast.

 - Eg havi sett mær fyri at gevast, sum støðan er í løtuni. Tað er 90 prosent sikkurt, segði Heidi Sevdal í gullrúsinum, eftir at NSÍ hevði vunnið greipuna.

Í dag ger 36 ára gamla Heidi Sevdal seg til reiðar at spæla sín landsdyst nummar 94. Tað er nógv flest hjá kvinnum og ájavnt metinum hjá monnunum, ið Fróði Benjaminsen eigur. Fríggjadagin skoraði hon sítt landsliðsmál nummar 30, tá Føroyar vunnu 2-0 á Moldova. So hví kúvendi áleyparin?

 - Fyri tað fyrsta var tað tí, at NSÍ kom í Champions League. Tað er spennandi, men eg var púra avklárað líka til jólar, tá okkurt kom í meg og segði mær, at eg var ikki klár at gevast allíkavæl. Hetta, sjálvt um eg hevði hvílt so væl í tí áðrenn, sigur Heidi Sevdal og leggur afturat:

 - Landsliðið er altíð spennandi. Eg eri tann týpan, at um eg eri við, so eri eg “all in”. Eg visti eisini, at um eg tók eitt ár afturat, so tók eg landsliðið við. Tað hevði eg eisini boðað frá áðrenn, so landsliðsvenjarin kundi hava tað í mentu, um eg ikki gavst.

Heidi Seval spælir við fullari ferð í ár og nærkast við hvørjum landsdysti nummar hundrað. Hetta er ikki hent í føroyskum landsliðsfótbólti, men áleyparin úr NSÍ er ikki so sinnað at tosa um tað.

 - Nú eri eg her, og tað verður hundrað prosent í ár, so fáa vit at síggja. Fyrr ella seinni má eg takka fyri meg. Eg vil gjarna finna hurðina sjálv, heldur enn at verða skumpað út, sigur Heidi Sevdal.

Føroyska kvinnulandsliðið spælir í dag kl 17 móti Gibraltar í Nations League. Kringvarpið vísur dystin í sjónvarpinum.