Einki næmingaheim á veg

Eingin ítøkilig ætlan er um at byggja næmingaheim til Heilsuskúla Føroya í Porkeri.

Sambært Heilsuskúlanum hevur ikki verið nakar stórvegis trupulleiki hjá næmingum at finna bústað.

Á heimasíðu skúlans kunnu útleigarar bjóða næmingum bústaðir.  

Djóni Nolsøe Joensen, landsstýrismaður, hevur svarað spurningi frá Dennisi Holm, løgtingsmanni.

Landsstýrismaðurin sigur tó, at hann er sinnaður at viðgera málið, um brúk verður fyri fleiri bústøðum til næmingar í Heilsuskúlanum.

Hann vísir á, at lestrarbústaðir eru við í virkseminum hjá Bústøðum.

Ein møguleiki er tí at kanna tørvin og møguleikarnar saman við Bústøðum.

Djóni Nolsøe Joensen nevnir eisini, at privat vinnurekandi hava hug at byggja ella leiga út bygning til næmingaheim til Heilsuskúlan.