Fýra atkvøddu móti Suðuroyartunlinum

Klokkan var farin væl og virðiliga av hálvgum níggju í gjárkvøldið, tá løgtingið samtykti uppskotið um Suðuroyartunnilin.

Uppskotið var samtykt við 28 atkvøðum fyri og fýra ímóti.

Orðaskiftið vardi í átta tímar og 20 minuttir.

Grímur Sundstein og Fía Selma Nielsen í Fólkaflokkinum, Helgi Abrahamsen í Samandsflokkinum og Liljan Weihe í Tjóðveldi atkvøddu ímóti.

Uppskotið hjá meirilutanum í fíggjarnevndini var samtykt.

Har var bara ein atkvøða ímóti, tann hjá Grími Sundstein.

Meirilutin sigur, at kannast skal, um Skúgvoyggin kann takast við.

Hann sigur, at tá Suðuroyartunnilin verður boðin út, skal atkomutunnil til Skúvoyar eisini vera boðin út.

Tá tilboðini eru komin, tekur løgtingið støðu til, um atkomutunnil til Skúvoyar skal gerast.

Meirilutin sigur eisini, at í tøttum samstarvi við kommunurnar í Sandoynni skal kannast, um betri loysn er enn vegurin á Traðarhamri, til dømis eitt berghol gjøgnum Traðarhamar.

Uppskotið hjá minnilutanum, Magnusi Rasmussen, um fíggingarleistin og um at prosjektera linjuføringina, um tunnilsmunnin verður innan fyri Múlan við Sandsbygd, fall.

Sambandsflokkurin og Grímur Sundstein í Fólkaflokkinum atkvøddu fyri og hini ímóti.

Nú er triðja viðgerð eftir, men hon verður ikki fyrr enn seinni í mai.