Føroyska tøgnmentanin hevur stórar sosialar avleiðingar

"Føroyar er eitt lítið samfelag, og tí hava vit eina sonevnda tøgnmentan," sigur Erika Hayfield, ph.d og lektari í samfelagsvísindum. 

Hetta ber í sær, at tað kann fáa stórar sosialar avleiðingar, um fólk tala at - eitt nú í sambandi við harðskap, vísir hon á. 

"Eitt harðskapsrakt heim er eitt heim í kreppu, og tí skulu vit tora betur at tosa um harðskap," sigur Erika Hayfield, ph.d og lektari í samfelagsvísindum.

Sosialt eftirlit og stigmatisering

Leiðarin í Kvinnuhúsinum, Eyðvør Tausen, hevur víst á, at vit hava eina tøgnmentan, sum hevur við sær, at tað er truplari at siga frá í sambandi við harðskap í føroyska samfelagnum. 

Víst verður á, at fólk møtast aftur í ymiskum samanhangum, og tað ger samfelagið gjøgnumskygt.

"Tað hevur við sær, at vit hava eftirlit við hvørjum øðrum í Føroyum. Og tað førir til sosialt kontrol og viðhvørt stigmatisering av personligum viðurskiftum," greiðir Erika Hayfield frá. 

Tí kostar tað eisini meira at siga frá í einum samfelagi sum tí føroyska.  

"So tey halda seg aftur, tí at tey eru kanska stúrin um sosialar avleiðingar fyri seg sjálvan, fyri familjuna ella í mun til møguleikarnar fyri at fáa størv og klára seg á arbeiðsmarknaðinum," útgreinar Erika Hayfield, ph.d og lektari í samfelagsvísindum.

Umráðandi at geva økinum ans

Tí er tað týdningarmikið, at vit geva hesum økinum ans, heldur hon. 

"Ein harðskapsraktur personur kann hava trupult við at koma burturúr tí sjálv, tí er tað umráðandi at samfelagið er klárt at stuðla undir og hjálpa viðkomandi burturúr einari harðliga støðu."

 Erika Hayfild vísir samstundis á, at tað kann vera ein fyrimunur, at Føroyar eru eitt lítið samfelag, tá okkurt skal gerast við eitt sovorðið mál. 

"Tá onkur talar at, og tað verður varpað ljós á nøkur viðurskifti, so kann tað eisini viðføra tað at broytingar henda lutfalsliga skjótt, tí vit hava ikki øgiliga  bureaukratiskar skipanir," sigur Erika Hayfield.