Ferryvolution: Her eru nýggja Ritan og nýggi Sam hjá SSL

Á Facebook-síðuni "Ferryvolution" liggja nú tvær tekningar av nýggju ferjunum, ið ætlanin er at byggja til at røkja oyggjaleiðirnar hjá Strandfaraskipum Landsins. 

Hvussu eftirfarandi tekningarnar eru er óvist, tí á einari at tekningunum stendur "Fyribils" skrivað á. 

Men sambært fólkunum handan Ferryvolution, so eru hetta nýggja Ritan og nýggi Sam, ið skulu byggjast og røkja leiðirnar til oyggjar í Føroyum, har tunlar ikki verða gjørdir. 

Í uppslagnum stendur eisini, at tað verður MEST, ið skal byggja ferjurnar. 

Cycloidal-propellur

Ritan skal vera 25 metrar til longdar, meðan Sam skal vera 43 metrar. 

Ritan fer at taka 75 ferðafólk og tveir bilar, meðan Sam skal taka 145 ferðafólk og 20 bilar. 

Á Ferryvolution heftir mann seg serliga við framdráttin hjá skipunum. Báðar ferjurnar fara at hava tvær bógskrúvur og tvær cycloidal-propellur, ið er nýggjasta tøkni á økinum. 

Nú verður spennandi at vita, um hetta veruliga eru nýggja Ritan og nýggi Sam.