Kinesarar kanna virki og skip í Føroyum

Tey, sum sleppa at selja til Kina, skulu vænta kinesarar á vitjan í september. 

Tá kemur kinesiski matvørumyndugleikin, GACC, á eftirlitsvitjan í Føroyum.

Hon verður frá 7. til 13. september, sigur Heilsufrøðiliga starvsstovan.

Heilsufrøðiliga starvsstovan og Uttanríkistænastan vóru í Kina fyrst í apríl.

Tá skrivaðu londini undir tvær protokollir, eina um veiddan fisk og eina um fiskamjøl og lýsi. 

Marknaðaratgongd

Við nýggju protokollunum verður marknaðaratgongdin til Kina víðkað.

Nú vil GACC síggja virki, skip og frostgoymslur í Føroyum. 

Virki og skip, sum eru á kinalistanum hjá Heilsufrøðiligu starvsstovuni, kunna vænta eftirlitsvitjan í september. 

Í tí sambandi er neyðugt at hava skjøl og annað dagført. 

Enn er ikki ásett, hvørji virki og skip vera vitjað, sigur Heilsufrøðiliga starvsstovan.