Taka samanum ætlanina um krabbamein í heyst

Í heyst ætlar landsstýriskvinnan í heilsumálum ar seta seg saman við Krabbameinsráðnum at taka samanum tilmælini í krabbameinsætlanini frá 2022.   

Tá verður staðfest, hvørji tilmæli eru eftir at fremja, og hvussu tey skulu ráðfestast.

69 tilmæli eru.

Ein stórur partur er settur í verk, ella tilmælini eru ávegis at vera framd.

Súsanna Bertholdsen, landsstýriskvinna, hevur svarað Kristionnu Winther Poulsen, løgtingskvinnu, sum spurdi um krabbameinsætlanina.

Landsstýriskvinnan sigur, at uppskot um heilsupolitikk kemur í tingið í heyst.

Og eftir ætlan verður uppskotið um tubbaks- og nikotinlógina lagt fram í komandi tingsetu.

Roykfrí

Eitt mál er, at tey, sum eru fødd  í 2015 og seinni, vera roykfrí og ikki brúka aðrar tubbaks- ella nikotinvørur, sigur landsstýriskvinnan.

Í svarinum, sum er drúgt - níggju síður- sigur Súsanna Bertholdsen millum annað, at Sjúkrahúsverkið  hevur raðfest at serútbúgva tveir læknar og tveir sjúkrarøktarfrøðingar til palliativa økið. 

Sjúkrahúsverkið hevur eisini undirvíst røktarstarvsfólki um krabbamein.

Og skeið um palliatión verður í heyst.

Palliativ viðgerð er linnandi, men ikki lekjandi.