Løgreglan kannar illgrunasamt deyðsfall í Havn

Løgreglan kannar eitt illgrunasamt deyðsfall í Marknalíð í Havn. Løgreglan fekk seint í gjárkvøldið boð um, at ein 61 ára gamal maður var funnin deyður á bústaði sínum. Tá løgreglan og sjúkrabilur komu á staðið, var greitt, at tann 61 ára gamli maðurin ikki er deyður á nátúrligan hátt.

Løgreglan tók stutt eftir ein 68 ára gamlan mann, sum er skuldsettur í málinum, tí hann er undir illgruna fyri at hava gjørt av við tann 61 ára gamla mannin. Skuldsetti maðurin skal eftir ætlan í grundlógarforhoyr í Føroya Rætti seinni í dag.

Rættarlæknalig líkskoðan og obduktión av tí deyða manninum verður eisini eftir ætlan framd seinni í dag.

Serfrøðingar frá Kriminalteknisku deild hjá Ríkispolitinum og ein rættarlækni koma til Føroyar í dag, fyri at kanna umstøðurnar nærri saman við politistum frá kanningardeildini í Føroyum, sigur løgreglan í tíðindaskrivi.

Hoyr Finn Koba í útvarpstíðindunum.