Skulu tosa um skiftisárini

Hon var mitt í fjørutunum tá fyrstu eyðkennini, um at hon var í skiftisárunum, vístu seg. Theresa Turiðardóttir Kreutzmann, sum í dag er 57 ár, visti tá ikki nógv um hetta tíðarskeiðið í lívinum. 

"Eg hugsaði allatíð, at kanska eg var sjúk. Altso, tann vegin". Tí vísur hon nú á, at vit skulu tora at tosa um skiftisárini, so aðrar kvinnur kunnu vera betri ílatnar.

Og tað er týdningarmikið at tosa um skiftisárini, tí sveiggj í hormonunum gera, at næstan øll gøgn í kroppinum verða ávirkað, sigur Katrin Kallsberg, serlækni í kvinnusjúkum. 

Sjóneykan á skiftisárini 

Í kvøld verða skiftisárini sett á breddan í Smæruni í Havn. 

- Nógvar kvinnur taka undir við tiltakinum, so tað bendir á, at her kanska er ein tørvur, sigur Katrin Kallsberg, sum er ein av stigtakaranum.

Aftrat henni eru Marianna Vang Simonsen, ergo- og zoneterapetur, umframt Bergtóra Høgnadóttur, HR-leiðari og master í positivari sálarfrøði. 

Katrin Kallsberg vísur á, at føroyskar kvinnur eru raskar at søkja sær vitan. Hon leggur kortini aftrat, at tað er hent í nýggjari tíð. 

"Eg haldi ikki, at mann hevur tosað um tað uppá sama máta fyri nøkrum fáum árum síðani. Tað er eitt tabu, sum er við at blíva brotið", sigur serlæknin. 

Theresa Turiðardóttir Kreutzmann heldur tað vera týdningarmikið at bróta tøgnina, tí hevur hon áður sett orð á skiftisárini. Til ber at hoyra meira um tað her:  Breddin: Kvinnuheilsa og skiftisárini