Kommuna breyt kommunustýrislógina

Tað var brot á kommunustýrislógina og kommunustýrisskipanina, tá eitt starvsfólk hjá Fuglafjarðar kommunu keypti ein arbeiðsbil til Fuglafjarðar havn uttan tøka játtan. 

Eftir keypið skundviðgjørdi býráðið keypið og játtaði pengarnar.

Tað var gjørt á býráðsfundi, sum var hildin fyri afturlatnum hurðum.

Kommunala eftirlitið hevur viðgjørt málið og gjørt niðurstøðu.

Hon er, at framferðin er brot á kommunustýrislógina og kommunustýrisskipanina og fundarskipanina hjá Fuglafjarðar kommunu.

Ein býráðslimur í Fuglafirði bað Kommunala eftirlitið viðgera málið.

Viðvíkjandi býráðsfundinum, sum var hildin fyri afturlatnum hurðum, heitir Kommunala eftirlitið á býráðið um at gera neyvari metingar um, hvørji mál kunnu viðgerast fyri afturlatnum hurðum.

Av tí at arbeiðsbilurin er keyptur, ger Kommunala eftirlitið ikki meira við tað málið.