Netanyahu og Rubio hava fund í Ísrael

Fyrrapartin fer ísraelski forsætisráðharrin, Benjamin Netanyahu, á fund við amerikanska uttanríkisráðharran, Marco Rubio, sum vitjar í Ísrael.

Tað upplýsir ísraelska uttanríkisráðið sambært The Times of Israel.

Fundurin byrjaði fyri einum tíma síðani, og eftir fundin, um middagsleitið, verður tíðindafundur.

Marco Rubio er á vitjan í Ísrael, og í gjár var hann við Grátingarmúrin í Jerusalem saman við ísraelska forsætisráðharranum.

Á fundinum við Benjamin Netanyahu skulu ísraelsku framtíðarætlanirnar við Gasa umrøðast, serliga við atliti at, um evropisk lond vilja góðkenna Palestina sum stat.

Ísraelska álopið á Doha í Katar í vikuni skal eisini umrøðast.