Fyrsta Brekumboðið er sett

Eirikur í Jákupsstovu, landsstýrismaður, hevur sett Eilif Magnusson Arge í starvið sum Brekumboð.

Hann er 34 ára gamal, og hevur kandidatútbúgving í fólkaheilsu og bachelor í sálarfrøði.

Eilif Magnusson Arge hevur fleiri ára starvsroyndir í donsku miðfyrisitingini, har hann hevur starvast sum fulltrúi í Ankestyrelsen og ráðgevi í almanna- og bústaðarmálaráðnum.

Eilif Magnusson  Arge er ættaður úr Klaksvík, men býr í Hoyvík.

Hann tekur við starvinum 1. oktober.

Brekumboðið fer at halda til í Klaksvík.

Brekumboðið er ein nýggj fyriskipan, sum hevur til endamáls at styrkja rættindi og lívikor hjá fólki, ið bera brek.

Brekumboðið skal hava eftirlit við, at føroysk lóggáva, tænastur og tilboð eru í samsvari við breksáttmálan. Eisini skal Brekumboðið veita ráð og vegleiðing, gera kanningar og frágreiðingar, birta kjak og arbeiða fyri, at røddin hjá fólki, ið bera brek gerst týðilig í almenna rúminum.