Stjórin á Herberginum ákærdur fyri brot á donsku heilsulógina

Stjórin á Herberginum hjá Frelsunarherinum, Martin Kúrberg, er ákærdur fyri brot á donsku sunnheitslógina.

Rættarmálið kemur fyri í næstu viku.

Tað er landslæknaembætið, sum hevur meldað málið til løgregluna. 

Málið snýr seg um, at tað fyri trimum árum síðani ikki var nóg gott skil á heiliváginum, sum stovnurin hevði liggjandi og útflýggjaði fólki, sum hildu til á Herberginum.

Martin Kúrberg vil, eftir ráðum frá advokati sínum, ikki gera viðmerkingar til málið fyri enn rættarfundin, sum verður 10. oktober. Hann sigur tó við útvarpið, at hann noktar seg sekan.

Lars Fodgaard Møller, landslækni, sigur, at øll viðurskifti nú eru í lagi á Herberginum, sum er fult góðkent til sítt virksemi.