Gongur illa hjá føroysku telvarunum í EM-kappingini

Tað gongur ongan veg hjá føroyska talvlandsliðnum í EM-kappingini í Georgia.

Í gjár skuldi tað vera. Vit møttu Írlandi, sum er styrkismett niðast av teimum 40 liðunum í kappingini. Men vit taptu. Hóast føroysku telvararnir vóru favorittar á øllum borðum við hægri styrkitali enn mótstøðumenninir, vann Írland kortini dystin 2½ - 1½.

Martin Poulsen vann á fjórða borði, og Høgni Egilstoft Nielsen telvdi javnt á fyrsta borði í enn maratontalvi, har hann skuldi verja seg við rygginum móti múrinum í nakrar tímar.

Luitjen Akselsson Apol og Rógvi Egilstoft taptu. Teir hava einki stig fingið enn.

Í dag telva Føroyar móti Finnlandi, sum er styrkismett nummar 32. Finnland tapti í gjár 2½-1½ fyri einum sterkum sveisiskum liði.

Føroyar, Finnland, Skotland og Portugal eru aftast eftir tríggjar dystir.

Evropameistarnir Serbia eru fremstir. Teir hava eins og Grikkaland fult stigatal eftir tríggjar dystir.