Búnaðarstovan seldi alla ullina í Føroyum

Búnaðarstovan fekk selt alla ullina, sum var til sølu í ár, til ein keypara í Føroyum.

Búnaðastovan vil ikki upplýsa prísin, men hann var nøktandi, verður sagt haðani.

Talan er um 33 tons.

Í fyrsta flokki var ull í seks náttúrulitum, okkurt um 27 tons.

Í øðrum flokki var ull, sum ikki er skild í litir, okkurt um um seks tons.

Ullin var seld í ballum, sum hvør vigar 250 kg.

Ullarmóttøka

Ullarmóttøkan. (Savnsmynd)

Taka ímóti aftur næsta ár

Treytað av, at játtan er í fíggjarlógini tekur Búnaðarstovan aftur móti ull næsta ár.

Í uppskotinum um fíggjarlóg fyri 2026 eru 492.000 kr. til útreiðslur.

Roknað verður við, at ullin verður seld fyri 300.000 kr.

Tað eru inntøkurnar.

Stuðulin er tí 192.000 kr.

Hetta eru somu tøl sum í ár.

Royndirnar undanfarin ár eru, sigur landsstýrið, at útreiðslurnar av ullarmóttøkuni eru størri enn inntøkurnar frá ullarsøluni.