60 dagar í villmarkini

60 dagar í villmarkini.

Soleiðis kunnu vikurnar í august og september best lýsast, tá Kristian Stórhamar saman við 11 øðrum føroyingum var í heldur øðrvísi arbeiðsørindum fyri KSMS í Grønlandi.

Talan var um at gera tvær heldur avbjóðandi verkætlanir við kjarnuboringum.

Tað eina arbeiðið gekk fyri seg í fjøllunum innan fyri Qasigiannguit, har jarðfrøðiligar kanningar skuldu gerast fyri Nunagreen, ið skal byggja vatnorkuverk. 

Hitt arbeiðið var fyri Ministry of Mineral Resources, og tann boringin bleiv gjørd á Nipisat úti á Diskooynni. Her var endamálið at kanna, um til ber at lagra Co2 í undirgrundini.

Tilsamans 25 menn úr 10 ymiskum londum vóru við í verkætlanini at gera arbeiðini

Tað serstaka var, at umstøðurnar vóru heldur primitivar, tí arbeiðini skuldu gerast á støðum, sum vóru rættiliga avsíðis.

- Vit máttu gera okkum eina tjaldlegu, sova í soviposa, gera mat á blussi og í roynd og veru liva sum skótar, sigur Kristian Stórhamar.

Nógvir kilometrar vóru til nærmasta bý og til vanligar hentleikar, og tað gav eisini avbjóðingar.

- Arbeiðsdagarnir bjóðaðu upp á nógvar forðingar og tekniskar avbjóðingar, men vit funnu altíð onkra loysn, sigur Kristian Stórhamar, og vísir millum annað á, at øll útgerð og amboð mátti fraktast við tyrlu ella prámi út á arbeiðsstaðin.

Í morgunsendingini greiðir Kristian Stórhamar frá serligu arbeiðsupplivingini í Grønlandi.