Svimjihøllin í Runavík letur upp

Svimjihøllin í Runavík letur dyrnar upp í dag, har fólk fáa høvi at síggja svimjihøllina, sum er partur av ítróttarøkinum, Bylgjuni, í Runavík.

Tað er tó ikki neyðugt við svimjiklæðum, tí sjálvir hyljarnir verða ikki tiknir í nýtslu enn.

Í komandi vikunum lata hyjarnir stigvíst upp fyri svimjarum, sigur Urd Johannesen, mentanarsamskipari í Runavík. Sjálv væntar hon, at svimjihøllin letur upp fyri almennari svimjing 1. februar.

- Hetta er nakað, sum vit hava bíðað leingi eftir - kanska yvir 60 ár, sigur mentanarsamskiparin í kommununi.

Í svimjihøllinini eru tríggir hyljar, ein 25 metra svimjihylur við átta geilum, ein barnahylur og ein heitur hylur. Eisini hevur svimjihøllin eitt vælveruøki.

Dreymurin um at fáa eina svimjihøll í Runavík er rættiliga gamal. Fleiri býráð hava hava ætlanir um eina svimjihøll, sum nú er vorðin veruleiki.

Svimjihøllin hevur kostað til samans 170 mió. kr.

Á heysti 2022 skrivaði kommunan undir avtalu við Kanjon, sum hevur staðið fyri byggingini.

Hoyr meira í samrøðu við Urd Johannesen, mentanarsamskipara í útvarpstíðindunum: