Trump hóttir við at leggja 200 prosent toll á franskt vín og sjampanju

Amerikanski forsetin, Donald Trump, hevur nevnt møguleikan at leggja 200 prosent toll á franskt vín og sjampanju, eftir at franski forsetin, Emmanuel Macron, ikki tók av innbjóðingini um ein sess amerikanska friðarráðnum.

Friðarráðið skuldi eftir ætlan stovnast í sambandi við endurreisingina av Gasa, men endamálsorðingin hjá ráðnum tykist ikki avmarka seg til hersettu økini í Palestina.

- Eg leggi 200 prosent toll á vín og sjampanju hjá honum. Og so kemur hann við. Men hann sleppur ikki við, sigur Donald Trump um franska forsetan Emmanuel Macron.

Tekur ikki av

Kelda, sum hevur tætt tilknýti til franska forsetan, segði í gjár við AFP-tíðindastovuna, at Frakland ongar ætlanir hevur um at taka av innbjóðingini til ráðið.

Sambært kelduni gongur endamálsorðingin hjá ráðnum út um karmarnar fyri Gaza.

AFP hevur seinni verið í samband við eina aðra keldu, sum eisini hevur tætt tilknýti til Macron, sum sigur, at viðmerkingin hjá Trump um toll á franskt vín er óhóskandi.

Trump hevur váttað, at hann hevur boðið russiska forsetanum, Vladimir Putin, við í ráðið, eftir at forsetaskrivstovan hjá Putin alment boðaði frá innbjóðingini í gjár.