- Tíðindi, mentan og ítróttur
Arbeiðstøk hava gjørt fríøki á Eirargarði
ALS hevur samstarvað við Eirargarð, Tekniska Skúla í Havn, Almannaráðið, Landsverk og J&K Petersen um verkætlanina.
Mynd: landsverk.fo
Verkætlanin er tann triðja í røðini, har ALS bjóðar arbeiðsleysum borgarum at taka eitt tríggjar mánaðar langt timburskeið á Tekniska Skúla í Havn, har tey bæði læra at tekna, arbeiða við timbri og gera eina størri verkætlan.
Góðar royndir frá fyrr
Verkætlanin á fyrsta skeiðnum var at gera eitt bygdarsavn í Kvíkvík. Onnur verkætlanin var at innrætta part av niðurløgdu smoltstøðini á Selatrað, sum Skótadeplinum fekk frá Bakkafrost fyri nøkrum árum síðani. Hesaferð er talan um at gera eitt fríøki til íbúgvar á Eirargarði í Havn.
- Treytirnar til hesar verkætlanirnar eru, at tær skulu vera samfelagsgagnligar, men ikki kappingaravlagandi fyri vinnuna, sigur Magni á Deild Olsen, stjóri á ALS.
Mynd: landsverk.fo
Tekniski Skúli hevur lagt hølir til og staðið fyri undirvísingini, Almannamálaráðið hevur latið fíggjarligan stuðul til tilfar, Landsverk hevur planerað fríøkið, og privata fyritøkan J&K Petersen hevur verið sera lagalig í mun til betongið, sum er lagt á lendið.