Ferðslutrygdin við Streymin má betrast

Borgarstjórin í Sunda kommunu rópar nú varskó, nú aftur eitt ferðsluóhapp var á vegamótinum við Streymin.

Tað er ikki fyrstu ferð eitt ferðsluóhapp ella vanlukka er júst her. 

Og nú má okkurt gerast við ferðsluviðurskiftini á strekkinum, sigur Eyðstein Zachariasen, borgarstjóri í Sunda kommunu.

Aðrir borgarstjórar hava eisini gjørt vart við ferðslutrygdina.

Skelti eru sett upp og ferðin sett niður. Nakað, sum fyrrverandi borgarstjóri, Heðin Zachariasen, m.a. mælti til sum fyribils loysn.

Men hetta er ikki nóg mikið, sigur borgarstjórin í Sunda kommunu.

Tvær møguligar loysnir liggja á borðinum. Ein tunnil undir landsvegnum ella ein rundkoyring, sum kann gera strekkið tryggari.

Landsverk: Játtanin røkkur ikki til meira

Landsverk, sum varðar av landsvegastrekkinum við Streymin, ætlar nú at seta ferðgáar upp. Teir skulu ávara fólk, um tey koyra ov skjótt. Men pengarnir røkka ikki til meira, sigur Landsverk.

Hoyr eisini Lovisu Petersen Glerfoss, stjóra í Ráðnum fyri ferðslutrygd, sum var gestur í sjónvarpsstovuni.