Fagnaðurin 25: Skylv tók øll á bóli í Orknoyggjum

Súsanna Skylv tók øll á bóli, tá hon vann tvey silvur- og eitt gullheiðursmerki á oyggjaleikunum á Orknoyggjum.

Góða úrtøkan kom eisini óvart á Súsannu sjálva, sigur hon eitt hálvt ár seinni. 

 - Eg hevði einki væntað, tá eg fór heimaífrá, um at eg fór at fáa so góð úrslit, fortelur hon. 

Súsanna Skylv legði út við silvuri í landavegssúkkling, og hon súkklaði seg eisini til silvurmerki í tíðarsúkkling. Býarsúkklingina ætlaði hon sær als ikki at kappast í.

Býarsúkklingin endaði við søguligum gulli

 - Tá eg fór avstað, sigi eg, at eg koyri bara einkultstart og landaveg. Eg koyri ikki criterium. Tí har er so nógv aktión, har eru so nógv sving, har er so nógv power í, og har er so nógvur taktikkur, og ferðin er høg. Tað er ein thrillari, also, sigur Súsanna Skylv.

Í samráð við súkklutoymið tók hon kortini eina seina avgerð um at royna, og tað vísti seg at vera skilagott. Hon var við millum tær fremstu og spenningurin vaks, tá hon brádliga datt. Full av adrenalini skundaði hon sær kortini upp aftur.

 - Eg koyrdi á, alt tað eg kundi. Eg veit ikki, hvussu nógv umfør eg súkklaði, áðrenn eg hevði tær aftur. Fýra kanska, ivast Súsanna Skylv. Hon røkkur kortini framaftur, og roynir at sleppa av við hinar báðar.

Klemm á mállinjuni

 - Og tær hanga uppi í, og tær hanga uppi í. So leingi tær eru í reyvini, er torført at sleppa undan, fortelur Súsanna Skylv. Brádliga eydnast tað kortini, og Súsanna Skylv vinnur eitt gullmerki, sum ger hana søguliga. Hon er fyrsta kvinnan, sum hevur vunnið oyggjaleikagull fyri Føroyum. 

 - Eg var so glað, og øll vóru so glað. Tað var heilt fantastiskt at koma á mál og fáa stórt klemm frá Torkili og Gunnari og Jákup Peturi og restini av føroyingunum, minnist jarnkvinnan, sum júst er komin aftur av venjingarlegu á Gran Canaria.

Kappingar í Svøríki, Spania og Italia eru fyri framman í ár, og so eru tað Oyggjaleikirnir í Føroyum næsta ár.

 - Ja, tað er tað. Eftirsum tað verður í Føroyum, haldi eg næstan, at tú skalt vera við, um tú kanst og hevur heilsuna.

Hetta innslagið var við í Ítróttafagnaðinum 2025. Sí sendingina her: