Oljugoymsla í Klaksvík fingið umhvørvisgóðkenning

Oljugoymslan hjá Magni við Grótrætt í Klaksvík hevur fingið umhvørvisgóðkenning frá Umhvørvisstovuni.

Útbyggingin umfatar ein verandi bensintanga, sum tekur 500 rúmmetrar.

Hann verður tikin niður, og fýra nýggir tangar verða settir upp, tveir bensintangar, sum hvør tekur 750 rúmmetrar, og tveir gassoljutangar, sum hvør tekur 3.000 rúmmetrar.

Eftir útbyggingina er mesta loyvda goymslan 11.500 rúmmetrar.

Umhvørvisstovan metir, at størsti umhvørvisligi vandin er leki ella óhapp, sum kann elva til dálking.

Harumframt eru útlát og óljóð frá skipum, pumpum og tangabilum týðandi viðurskifti.

Tí eru treytir um tangagarðar, oljutætt øki, ávaringarskipanir, trygga handfaring, reinsing av spillvatni í oljuskiljara við sjálvvirkandi afturlating, umframt mannagongdir um eftirlit, viðlíkahald og tilbúgving.

Avgerðin um umhvørvisgóðkenning kann kærast til landsstýriskvinnuna í umhvørvismálum. 

Umhvørvisgóðkenningin sæst her.