146 km/t í Norðoyatunlinum

Ein bilførari missir helst koyrikortið treytaleyst, tí hann var máldur at koyra 146 km/t í Norðoyartunlinum fyrrapartin í gjár.

Lógin sigur, at verður koyrt 50 km/t skjótari enn mest loyvda ferð, so er vandi fyri at missa koyrikortið treytaleyst.

Náttin hevur sum heild verið friðarlig, sigur vakthavandi á løgreglustøðini.

Kortini er ein maður skuldsettur fyri brot á skilhaldsreglurnar og ein annar maður skuldsettur fyri ikki at upplýsa navn sítt, tá løgreglan spurdi, hvør hann var. 

Hesin endaði í brummuni.

Tað hevur verið kalt í veðrinum og løgreglan hevur koyrt trý full fólk til hús.