Trump vil senda sjúkrahússkip til Grønlands

Donald Trump sigur, at USA ætlar at senda eitt sjúkrahússkip til Grønlands. 

Boðskapurin kom í nátt á sosiala miðlinum hjá forsetanum, Truth Social, har Trump eisini deildi eina vitlíkis-mynd av einum slíkum skipi.

Sambært Trump skal skipið sendast í samstarvi við Jeff Landry, sum, umframt at vera guvernørur í Louisiana, eisini er útnevndur serligur sendimaður hjá USA í Grønlandi.

Trump skrivar, at sjúkrahússkipið skal hjálpa fólki, sum sambært honum eru sjúk og ikki fáa neyðuga hjálpina. Tað er tó ógreitt, um ætlanin er verulig, og hvørjir sjúklingar skulu viðgerast.

USA hevur tvey slík skip - USNS Mercy og USNS Comfort - men bæði liggja í løtuni á skipasmiðju í Alabama.

Orla Joelsen, sum áður hevur stillað upp fyri Attasut og ofta leggur seg út í kjakið um USA og Grønland sigur, at útsøgnin er  “sálarlig krígsførsla”.

- Vit hava ikki nakra heilsukreppu her í Grønlandi, og vit hava ikki tørv á hjálp frá USA, sigur Orla Joelsen við Danmarks Radio og leggur afturat, at hann heldur tað vera lítið sannlíkt, at eitt amerikanskt sjúkrahússkip fer at leggja leiðina framvið Grønlandi.