Starvið sum landsapotekari fer í søguna

Starvið sum Landsapotekari fer í søguna og ein nýggj skipan setast í verk í oktober í ár. Orsøkin er, at arbeiðsøkið hjá Landsapotekaranum í dag fevnir so breitt, at hann í síðasta enda kann hava eftirlit við sær sjálvum  - hann umsitur í dag lógirnar um apoteksverkið og heilivág og hinumegin hevur hann eftirlit við, at lógirnar verá hildnar.

Fyri at sleppa undan hesum dupultleikluti, so hevur Landsapotekarin keypt sær til, at Lægemiddelstyrelsen í Danmark fremur ein part av eftirlitinum - men í síðsta enda er tað Landsapotekarin, sum hevur myndugleikan.

Ætlanin við nýggja bygnaðinum er, at býta bygnaðin sundur, og deila tað millum sjálvy Apoteksverkið og Heilsustýrið. Raksturin skal liggja hjá Apoteksverkinum og eftirlitið hjá Heilsystýrinum. Heilsustýrið metir seg tó ikki ført fyri at hava neyðuga eftirlitið við heiliváginum, og tí skal avtala gerast við danska Lægemiddelstyrelsen, at hava eftirlitið við Apoteksverkinum.

Higartil hevur verið krav, at landsapotekarin hevur havt eina farmaceutiska útbúgving á kandidatstigi. Men Heilsumálaráðið heldur at hetta kravið kann sleppast. Ístaðin skal tann nýggi stjórin fyri Apoteksverkið, sum avloysir Landsapotekaran, kunna leita sær ráðgeving frá apotekarum.