Góðar 100 mió. kr eftir til farstøðina

Tilboðini eru hægri, men nú verður neyðugt at skarva av verkætlanini um nýggja farstøð á flogvøllinum

Tilboðini upp á farstøðina í Vágum eru hægri enn tøki peningurin, og tí verður neyðugt at skarva av verkætlanini.

14.08.2012 - 17:36

<div>Vága Floghavn hevur ikki fleiri enn tær 102 milliónir krónurnar at byggja farstøð fyri, og nú verður kannað, hvat fæst fyri hesa peningaupphædd.</div><div><br></div><div>Í gjár var nevndarfundur í partafelagnum Vága Floghavn, og nú byrja samráðingar við byggifyritøkuna Articon í eini roynd at vita, hvat felagið kann gera fyri tøku upphæddina.</div><div><br></div><div>- Vit hava ikki fleiri pengar, og tí mugu vit kanna, hvat vit kunnu fáa fyri tær 102 milliónirnar. Articon og ráðgevarar okkara undir Farport-samtakinum arbeiða víðari við málinum, sigur Jákup Sverri Kass, stjóri í Vága Floghavn.</div><div><br></div><div>Articon hevði bíligasta tilboðið, tá tilboðini vórðu latin upp beint fyri ólavsøku. Fimm undangóðkendar byggifyritøkur vórðu bodnar at bjóða, og Articon metti seg at kunna gera arbeiðið fyri 125 milliónir krónur.</div><div><br></div><div>Hinar tríggjar fyritøkurnar, J&K Petersen, Búsetur og E. Phil & Søn, lógu munandi hægri, úr 153 upp í 161 milliónir krónur.</div><div><br></div><div><b>Skerja ikki fermetratalið</b></div><div><br></div><div>Jákup Sverri Kass vísir á, at tað ikki er óvanligt, at byggiharri og arbeiðstakarar samráða seg fram til ein bíligari kostnað, eftir at lisitasjónin hevur verið.</div><div><br></div><div>Spurdur, hvar skorið verður, staðfestir flogvallarstjórin, at talan verður ikki um at skerja fermetratalið í ætlaða terminalbygninginum. Sparingin verður helst í útreiðslunum fyri tilfar og tílíkt.</div><div><br></div><div>Væntandi verða næstu 14 dagaranir brúktir til hetta arbeiðið, og ætlandi er avtalan fingin í lag um mánaðarskiftið, so byggiarbeiðið kann byrja tá, sigur Jákup Sverri Kass.</div><div><br></div><div>Arbeiðið at gera byggiplássið klárt er annars byrjað. Farmahøllin, sum stendur á økinum, har nýggja farstøðin skal verða, verður nú tikin niður. Vága Floghavn hevur latið høllina til Vága Bjargingarfelag, sum fer at seta hana uppaftur á ídnaðarøkinum hjá Sørvágs kommunu skamt frá flogvøllinum.</div><div><br></div>