SÍ kann taka føroyameistaraheitið á "heimavølli"

SÍ vann á Mjølni í fyrstu FM-finaluni í Hotel Djurhuus-deildini, og kann tryggja sær meistaraheitið við sigri á "heimavølli" á Giljanesi sunnudagin.

Dysturin í Badmintonhøllini í Klaksvík endaði 3-1 til sørvágskvinnurnar.

Mjølnir vann annars fyrsta settið. Liðini skiftust um at vera frammanfyri, men heimaliðið fekk avgjørt til 25-23. 

SÍ javnaði til 1-1, tá Anja Danielsen smasjaði til 25-23, og úrslitið varð hitt sama í 3. setti, tá Paula Nattestad Joensen átti avgerandi stigið.

Sørvingar vóru klárt omaná í 4. setti, sum endaði 25-16, og sunnudagin hevur Mjølnir knívin á barkanum á Giljanesi.