Chuck Norris deyður

Fyrrverandi heimsmeistarin í karate, Chuck Norris, ið brúkti sínar førleikar á stríðsmottuni til at gerast filmsstjørna, er deyður, 86 ára gamal. 

Tað kunngerð familja hansara á sosialu miðlunum.

Familjan ger samstundis vart við, at hon gjarna vil halda umstøðurnar fyri andlátið privatar, men at Chuck Norris var umgirdur av sínum nærmastu, tá hann andaðist, og at hann hevði frið í sinninum. 

Chuck Norris vann fleiri karate-meistaraheitir síðst í sekstiárunum, og hansara vinarlag við karate-legenduna Bruce Lee gjørdi, at hann fekk ein leiklut í filminum "The Way of the Dragon" hjá Bruce Lee frá 1972. 

Filmurin gjørdist sera væl umtóktur, og tað hevði við sær, at Chuck Norris fekk møguleikan at gera fleiri aðrar action-filmar, eitt nú "Invasion USA" og "The Delta Force". Men tað er kanska serliga sjónvarpsrøðin, "Walker, Texas Ranger", ið fólk flest kenna Chuck Norris fyri. 

Chuck Norris var politiskt virkin og stuðlaði høgravonginum í USA.